Buurhakaba (insidesomalia.org) - Xoogag ka amarqaata Ururka Al-shabaab ayaa la wareegay xalay gacan ku haynta degmada Buurhakaba Gobolka Bay, iyagoo halkaas ka bilaabay sida wararku sheegayaan sugidda ammaanka.

Maamulkii Degmadaas ayaa horay uga baxay Degmada, iyadoo dadka Degmadu ay sheegeen in ay jireen fariimo gaaray, taasna ay keentay in ay si dhaqso badan uga baxaan halkaas.

Shacabka ku dhaqan Buurhakaba ayaa waxay sheegeen inaysan jirin wax dagaallo ah oo halkaas ka dhacay markii ay soo galayeen xoogaga ka amarqaata Al-shabaab, iyadoo weli halkaas ku sugan.

Maamulka Gobolka Bay ayaan weli wax hadal ah kasoo saarin qabsashada Degmada Buurhakaba, waxaana tani ay qayb ka noqonaysaa dhaqdhaqaayo ay kooxaha ka horjeeda Dowladda ka wadeen xilliyadii ugu dambeeyay qaybo ka tirsan Gobollada Bay iyo Bakool.

Dhawaan ayay ahayd markii xoogaga Al-shabaab ay la wareegeen gacan ku haynta xerada Ciidamada ee Daynuunaay, halkaasoo ay ku dileen mid ka mid ah askarta Dowladda.

Ma aham markii ugu horeysey oo ay xoogaga kasoo horjeeda Dowladda ay lawereegaan Magaalada Buurhakaba oo ah Magaalo istaraatiji u ah dagaalka,iskuna xirta Magaalooyinka Muqdisho iyo Baydhabo.